【東方日報訪問】學足大戶 玩盡美市場外交易

大戶好似投行、以至對沖基金咁，好多時都會喺場外交易平台(OTC，Over-The-Counter)做大額交易，不過「這些機會」絕對唔係大戶專享福利，你懂的，孖妹一向都係「無懼世事變改，還是愈難愈愛……」愈新奇有趣嘅嘢，就愈吸引到我哋開File調查佢，我哋發現香港股友唔止有玩開OTC市場，仲要玩到飄洋過海，玩到去阿美利堅！ ●美OTC市場年成交萬五億 吳：投資書作家、「美股隊長」 吳瑞麟 彩兒：你嘅美股股齡有10年，究竟有啲乜係可以滿足我「新奇」、「有趣」、「又好玩」三個願望㗎？ 吳：你咪話你夏天掛住買衫裝身，搞到唔夠銀彈玩盡股市嘅，我有個方法係可以用少少錢就可以玩盡多國藍籌股，以至公司仔……嗱，就係美國嘅OTC市場喇。場外交易意思係喺交易所外進行證券買賣嘅市場，係一啲無形、無固定嘅市場，好似我同朋友之間一買一賣，咁都算係OTC㗎。 吳：美國OTC市場上市嘅股份，除咗一啲未合上市要求嘅小型公司、初創企業外，仲會有大量預託證券(ADR)，係海外嘅大公司，例如任天堂(交易編號：NTDOY)、Louis Vuitton母公司LVMH(LVMUY)、Heineken(HEINY)、法國興業銀行(SCGLY)、軟銀(SFTBY)等等，甚至係香港股友追捧嘅股王騰訊(00700；TCEHY)都有上，佢哋唔使做符合美國會計準則嘅財務報表，就可以喺當地OTC上市，所以呢個市場嘅規則當然比交易所鬆好多啦，但要留意流通量，差價或會闊啲，而且交投較疏亦令人用唔到技術分析揀股，所以要好熟行業同公司先適合參與市場。 Kitty：咁多壞處都仲有人玩，即係有吸引之處啦！睇番美國主要交易中介之一的OTC Markets數據，話截至2016年底，佢哋全年做咗1,930億美元(約15,054億港元)成交，都真係唔嘢少。 吳：美股其中一樣令人趨之若鶩嘅係，買一股都已可入場，以任天堂為例，如係買日股，每手100股，以上周股價約35,000日圓計，就要超過24萬港元先可以入場喇，若然係OTC市場只係約38美元(296港元)就可做股東；以騰訊為例，以上周約270港元計，香港要27,000港元先買到一手，OTC市場只需34.28美元(約267.38港元)就買到一股。 吳：仲有呀，同一個交易時段就可以玩盡環球股票，又唔使將本金兌成多國貨幣，可以免卻麻煩同將外匯風險減低；而美國係有集體訴訟權，法制同香港唔同，當地小股東遇上不公平事件可以一齊告啲上市公司。 彩兒：你幾時開始喺美國OTC市場搵食，做過江龍好威威？ 吳：梗係唔係啦，當時係被逼開始㗎，哈哈﹗喺5至6年前，當年我仲未完全用技術分析炒股，迷信「故事」題材，想博鈀金價格反彈，所以買入咗一間美國上市嘅鈀金公司，點知佢被交易所除咗牌，轉咗去OTC市場交易，最終都沽出股份，勁蝕﹗比較開心嘅一仗，就係趁任天堂嘅Pokémon Go熱潮買入股份，最終有逾兩成回報。 ●門檻低　自建組合分散風險 D：散戶 Daniel Kitty：點解你有近在眼前嘅港股唔玩，偏偏要炒到去美國，仲要玩到咁刁鑽？ D：其實我股齡有20年，美股就係2014年炒到依家，當時就玩埋OTC市場。我舊年8月起做埋職業投資者，依家港股同美股投資組合倉位係1比1，港股係藍籌股居多，而美股因為市場深度夠，所以指數成分股以外嘅大價股都會揸。 D：我恒常嘅美股組合投入嘅本金有六位數字港元，組合一般會由20至30隻股份組成，由於美股可以一股股買，入場門檻低，所以先可以用呢個數額資金，都做到咁分散風險嘅效果，我每周都會參考StockCharts Technical Rank(SCTR)調整組合嘅，所以我都算係被動式咁參與OTC市場，而唔係旨在發掘明日之星。我今年都試過喺OTC市場買入騰訊，不過賺幅唔多，好快就沽出咗。 彩兒：點先玩到美國嘅OTC市場，其實皮費重唔重呢？聽聞你一踏足OTC市場，就有一個極為慘痛經歷？ D：以往係做開IT嘢嘅，好鍾意喺網上搵資料做研究，唔怕網上做交易，不過要留意，美國OTC就唔係間間券商都有做，部分收費仲好貴添，我幫襯緊一間美國上市嘅券商，佢哋喺香港都有Office，交易費真係平絕全行，單邊佣金只係1美元(約7.8港元)，OTC報價要另外每月畀3美元(23.4港元)。 D：藍寶石水晶玻璃供應商極特先進科技(GTATQ)以前係蘋果公司(Apple Inc.)供應鏈之一，喺2014年，我買入咗佢，點知佢產品唔合規格，搞到Apple唔再同佢合作，最終破埋產，股價暴跌約9成，除牌後就轉咗去OTC交易，我記得買入時係幾十蚊美元，喺OTC賣出係得幾仙，真係一殼眼淚。 ●港人較熟悉新股場外交易 Kitty：其實港股嘅場外交易唔活躍，亦分開咗兩批市場，包括散戶場外交易同大戶嘅場外交易，目前散戶嘅場外交易多數喺證券行進行，交易類別以即將上市嘅新股為主，散戶最常用嘅新股場外交易中介包括耀才證券同輝立証券，新股喺上市前一日，可以透過呢類券商嘅暗盤交易，率先買入或沽售。 彩兒：至於大戶呢，幾年前時興嘅係黑池交易(Dark Pool Trading)，個名都型過人！所謂「黑池」，係指交易所以外大戶專用嘅場外交易平台，買賣雙方透過黑池交易，令其他經紀唔可以獲知盤路或身份等相關交易細節。黑池交易指令執行時間縮短，提升交易效率，所以受到投行和券商等機構客戶歡迎。不過，黑池交易透明度低，投資風險高，證監會已在2015年禁止散戶進行黑池交易。 大戶場外交易嘅例子，就好似停牌超過兩年嘅漢能薄膜發電(00566)，前主席李河君喺2015年12月喺場外以「賤價」每股0.18元人民幣，賣出漢能超過25億股，套現5.4億港元，出售價較公司停牌前3.91元，大幅折讓94.5%。