6月11日 on.cc 東網／東方日報 訪問：忠實炒家個股賺2倍
吳：「美股隊長」吳瑞麟
Kitty：你只炒美股，你都好崇洋喎！
吳：我2008年開始炒美股，當時港股美股齊齊炒，一開始學藝時巧遇金融海嘯，當時美股做借貨沽空易過港股，所以就由「沽」起家，到2012年起內地經濟增長放緩，我就脫離港股，齋玩美股。最初投資美股，我主要係以技術分析加上基本因素分析嚟揀股，但係去到近3年，我就全面只用技術分析喇，有時連間公司係做乜嘅都唔知㗎。
唔用基本因素係有苦衷，美股近年升得最勁嘅係科技股或生物科技股，有時啲藥品講完自己都唔識，唔似金融股、消費股咁可以自己研究。我現時主力會發掘創歷史新高嘅大型股，呢啲股唔會有蟹貨，投資者唔會急住食胡，甚至係搶雞胡，美國基金公司都會揸重倉，好似亞馬遜(AMZN)、facebook、Tesla咁，我特別鍾意美股市場深度夠，又夠安全，冇咁多造假帳問題，股份流通量又充足。
彩兒：啲股友成日話買美股係隔山打牛，乜佢真係值得你撇甩港股咩？
吳：我近2年嘅代表作係喺33美元買入晶片股NVIDIA(NVDA)，後來就喺約100美元沽出股份，後來股份再創新高，首仗賺約2倍。
