【訪問重溫】善用美國ADR 輕鬆投資海外名企


按:以任天堂為例,如係買日股,每手100股,以股價44,000日圓計,就要超過32萬港元先可以入場喇,若然係OTC市場只係約52美元(405港元)就可做股東

------------------------

大戶好似投行、以至對沖基金咁,好多時都會喺場外交易平台(OTC,Over-The-Counter)做大額交易,不過「這些機會」絕對唔係大戶專享福利,你懂的,孖妹一向都係「無懼世事變改,還是愈難愈愛……」

愈新奇有趣嘅嘢,就愈吸引到我哋開File調查佢,我哋發現香港股友唔止有玩開OTC市場,仲要玩到飄洋過海,玩到去阿美利堅!

●美OTC市場年成交萬五億

吳:「美股隊長」 吳瑞麟

彩兒:你嘅美股股齡有10年,究竟有啲乜係可以滿足我「新奇」、「有趣」、「又好玩」三個願望㗎?

吳:你咪話你夏天掛住買衫裝身,搞到唔夠銀彈玩盡股市嘅,我有個方法係可以用少少錢就可以玩盡多國藍籌股,以至公司仔……嗱,就係美國嘅OTC市場喇。場外交易意思係喺交易所外進行證券買賣嘅市場,係一啲無形、無固定嘅市場,好似我同朋友之間一買一賣,咁都算係OTC㗎。

吳:美國OTC市場上市嘅股份,除咗一啲未合上市要求嘅小型公司、初創企業外,仲會有大量預託證券(ADR),係海外嘅大公司,例如任天堂(交易編號:NTDOY)、Louis Vuitton母公司LVMH(LVMUY)、Heineken(HEINY)、法國興業銀行(SCGLY)、軟銀(SFTBY)等等,甚至係香港股友追捧嘅股王騰訊(00700;TCEHY)都有上,佢哋唔使做符合美國會計準則嘅財務報表,就可以喺當地OTC上市,所以呢個市場嘅規則當然比交易所鬆好多啦。

但要留意流通量,差價或會闊啲,而且交投較疏亦令人用唔到技術分析揀股,所以要好熟行業同公司先適合參與市場。

Kitty:咁多壞處都仲有人玩,即係有吸引之處啦!睇番美國主要交易中介之一的OTC Markets數據,話截至2016年底,佢哋全年做咗1,930億美元(約15,054億港元)成交,都真係唔嘢少。

吳:美股其中一樣令人趨之若鶩嘅係,買一股都已可入場,以任天堂為例,如係買日股,每手100股,以股價44,000日圓計,就要超過32萬港元先可以入場喇,若然係OTC市場只係約52美元(405港元)就可做股東;以騰訊為例,以約430港元計,香港要43,000港元先買到一手,OTC市場只需56美元(約267.38港元)就買到一股。

吳:仲有呀,同一個交易時段就可以玩盡環球股票,又唔使將本金兌成多國貨幣,可以免卻麻煩同將外匯風險減低;而美國係有集體訴訟權,法制同香港唔同,當地小股東遇上不公平事件可以一齊告啲上市公司。

彩兒:你幾時開始喺美國OTC市場搵食,做過江龍好威威?

吳:梗係唔係啦,當時係被逼開始㗎,哈哈﹗喺5至6年前,當年我仲未完全用技術分析炒股,迷信「故事」題材,想博鈀金價格反彈,所以買入咗一間美國上市嘅鈀金公司,點知佢被交易所除咗牌,轉咗去OTC市場交易,最終都沽出股份,勁蝕﹗比較開心嘅一仗,就係趁任天堂嘅Pokémon Go熱潮買入股份,最終有逾兩成回報。

附錄:美國上市部份的海外名企ADR

台積電 (TSM) SONY (SNE) 豐田汽車 (TM) 軟庫 (SFTBY) 任天堂 (NTDOY) Jardine Matheson Holdings Ltd (JMHLY) Adidas (ADDYY) 曼聯 (MANU) 日本樂天集團 (RKUNY) 騰訊(TCEHY)

(2017年7月《東方日報》訪問,任天堂、騰訊股價為現時股價)

🎉🎉美股隊長 美股ETF速成班(網上),適合無經驗的美股新手,詳情:https://bit.ly/2RNzifB

Featured Review
Tag Cloud

© 2023 by The Book Lover. Proudly created with Wix.com

  • Grey Facebook Icon